AGI ULIH ENDUR BEJALAI: Dipelaba pagila (seharitu) orang mayuh belabuh datai ngundang Pasar Betong.
BETONG: Pasar Betong mengkang sunyi taja pan dua hari da agi alai pengari parti politik nganjung nama sida iya ba palan ke udah ditetapka.
Pansik ba Pasar Betong diperatika bedau mayuh kerita sereta mensia ke deka ngundang Pasar Betong sebedau hari nganjung nama.
Lebuh bejalai ba Pasar Betong, diperatika nadai poster, banner tauka bunting digantung ba pasar nya, laban dipelabaka nyangka deka digantung pagila (seharitu) tauka ba hari nganjung nama.
Nitihka sida ke gawa ba hotel di Pasar Betong, orang mayuh belabuh datai ngundang pasar nya dipelaba pagila (seharitu) taja pan bisi sekeda kerita opis perintah udah belabuh datai seharitu (kemari).
Hotel ba Pasar Betong nitih ku orang ke gawa ba Medan enggau Betong Plaza madahka hotel nya sereta sekeda hotel mit bukai deka nerima temuai sida iya belabuh ari pagila (seharitu) lalu dijangka penuh nyentuk ngagai abis maya bepilih.
Ba pengawa bepilih besai menua DUN Sarawak ti ke-10 tu ila (16 April), penyandang sitak Layar Datuk Patinggi Tan Sri (Dr) Alfred Jabu anak Numpang ari Parti Pesaka Bumiputera Bersatu (BN-PBB) dipelaba deka betangkup enggau Parti SNAP sereta Parti Keadilan Rakyat (PKR).
Ba sitak Bukit Saban, penyandang sitak nya, Robert Lawson Chuat ari BN-PBB dipelaba deka betangkup enggau tiga parti bukai, iya nya Parti SNAP, Parti Keadilan Rakyat (PKR) enggau pengari ngatika diri (Bebas).
Sumber : BorneoPost
No comments:
Post a Comment